【心情分享 ，長文慎入】
呢個係公關仔尋晚嘅心路歷程。
.
尋晚一路睇住旺角嘅新聞，一路由好嬲、變得好灰心，然後又好憤怒。十二點幾果陣，我突然覺得好絕望。
.
然後我決定熄電視，關電腦，手機都唔睇，去咗執屋，想分散下注意力。執執下，我突然諗到，呢個屋企就話可以執，但香港呢個家，我可以點執？
.
結果我坐咗係廳大喊咗一輪。
.
最後當然係去咗瞓覺，今朝瞓醒覺得好少少。
今朝我決定要遠離新聞一陣，再搵咗個好朋友傾計。 (當然係開工扮做野然後狂Whatsapp啦)
.
想分享呢個message俾大家知，係覺得依家係咁亂嘅時勢，可能加上少少自身嘅大小困難，真係會令到人情緒好爆炸。
.
或許我尋晚做嘅並唔係最好嘅方法，公關仔亦唔係心理專家分享案例。我只係想分享，面對好大壓力時，真係要行開下，抖下，然後再嚟過，唔係真係好難打一個長期嘅戰爭。
.
公關仔知道呢度好多marketing嘅朋友，呢排咁多社運，唔多唔少都會令到我哋班客戶活動要改期、social media又要小心處理，加上又抵制下CCTVB，班客又會叫我哋執過啲advertising plan，仲有pk政府嘅回應，經常出外遊行嘅日程等等，有時仲會因為追新聞或者心情欠佳失眠，真係會心煩氣燥多疑兼體力不繼。
.
經過朋友嘅一輪勸解，依家公關仔覺得好好多啦。
.
有位前輩做event成日用一個比喻，event就如演唱會Sammi係台下升緊上嚟，一切蓄勢待發，the show must go on。你死都要死掂佢，唔可以等。
但經過呢排嘅運動，公關仔覺得，成個production係team work，當你要行開行埋處理其他事，就會有人補上你個位。可能你會覺得，Sammi上到台就得啦！錯！試下佢無咗個producer、FM或者Dresser？個show都會好亂或者做唔成。一個show無人係最重要，因為成個production，係個個都咁重要。行開行埋嘅時間，大家就補位。緊守崗位係緊要，補位都緊要，但識得走位，都係好緊要。Be Water，或者都可以咁解。
.
我覺得香港依家呢場運動，就係咁樣。
.
我哋大家一齊加油！
.
PS: 其實我都諗咗好耐好唔好打呢篇野出嚟，一來自己心情好負，唔想應付果啲網絡五毛。但最後諗諗下，覺得唔好話係咪諗唔通，而係呢啲低潮嘅情緒其實好多人都有，想俾大家知道其實同行者真係真係好多。起碼我問咗三個人，三個人都即答原來係有情緒跳掣。呢個問題係要正視同解決，我哋先可以一齊走更長嘅路。
香港人，真係好攰，但我地一齊Be water，一起走下去！
#甩晒啲news想跟返時朋友全部講返我知 #仲有好多同行鼓勵嘅說話 #得到人哋關心其實心情好好多 #真係多啲關心人同唔好介意話俾人聽自己唔掂 #多謝陪我吞泡的你你你 #係呀係講陪我傾whatsapp扮開工嘅你呀 #明顯繼續扮工打文
Search